برج ايفل
باريس عاصمة النور والجمال .. وهي احدى المدن الفرنسية الجميلة
وراح ابدا بالمناطق في باريس حيث ان باريس تنقسم الى عشرين منطقه وتسميتها تبدا من باريس واحد الى باريس عشرين … طبعاً احلى المناطق واشهرها هي باريس ثمانيه .. بسبب وجود شارع المشاهير الشانز اليزيه
وبعض الشوارع الاخرى مثل الافنيو مونتين وسان اونوريه (او سانت هونور )
يبدا الشانزليزيه من المسلّة المصرية في منتصف ساحة الكونكورد وينتهي بقوس النصر وانت ماشي على الشانزاليزيه راح تشوف جميع جنسيات العالم … والحركةفيه تبدا من الصباح بافتتاح اليابانيين وتنتهي في حدود الساعة خمس الفجر..وطبعاً آخر من يمشي فيه ربعنا السعوديين
يبدا الشانزليزيه بقوس النصرARC DE TRIOMPHE وارتفاعه ياصل الى 110 متر اذا طلعته يعطيك بانورما على الشانزاليزيه ولا اروع منه.
. المحلات في هالشارع كثيره ومن اشهرها محل العطورات وادوات الزينة سيفورا ..وهالمحل يعتبر اكبر محلات العطورات في باريس .. SEPHORA
^^^
ومن المحلات الكبيرة في هالشارع محل اسمه فناكFNAC والمحل هذا جنب السيفورا وهو في قلب الشانز اليزيه والمحل هذامشهور بالادوات الالكترونيه من كمبيوترات وجوالات وافلام فيديوواغاني .. المحل هذا يبيع شرائح جوال مدفوعه (سوا الفرنسيين) .. سعر الشريحه حوالي 30 يورو .. ويطلبون منك احضار جواز سفرك عشان يعطونك شريحه!!
وفيه من المحلات الكبيره فيرجن المختص بافلام الفيديو والقيم والاغاني ..والمحل هذا يتفوق على فناك في مجال الافلام والاغاني .
وفيه محل ديزني لملابس والعاب الاطفال .. ولوي فيتون LOUIS VUITTON وهذا من اغلى محلات الجلديات .. وتلقى اليابانيين صافين سرا عليه .. وبصراحة بضايعه حلوه مره.
.
وشارل جوردان للاحذيه والجاكيتات .. ومحل قاب للملابس.. والمحلات كثيره لو اعددها كلها ماخلصت
بعض شركات السيارات الكبيره لها صالات عرض خياليه في الشانز اليزيه .. ومنها معرض للمرسيدس موجود فيها موديلات خياليه .. ومعرض لتويوتا .. ومعرض رينو ..وفيه صالتين سينما لعرض اخر الافلام الامريكيه .. بس انتبه للفلم .. ترا فيه عرض باللغة الفرنسيه وفيه عرض باللغة الانجليزيه وتقدر تسال اللي يبيع عند الشباك وش اللغة في الفلم اللي راح تحضره او تشوفها على اللوحة الاماميه لاوقات الافلام
سوبرماركت كبيره اسمها مونوبغيMonoprix شعارهم .. كلش في الثلاجة!!!
نجي لاماكن التبطح واللي اذبح السعوديين عندها .. المقاهي والمطاعم.
طبعاً اشهر مقهى هو الفوكيتFouquets… مافيه احد راح فرنسا ولاجلس فيه . وهو مسمى نسبة الى مؤسسه لويس فوكيه .. خيالي .. صاير في الزاويه بين الشانز اليزيه وشارع جورج الخامس ..قبل ماتجلس في الفوكيت نصيحتي لك ادخل كشك الجرايد اللي قدامه واشترى الجرايد العربيه مثل الشرق الاوسط او الحياة وسو نفسك مثقف قدام اللي رايح واللي جاي قدام الفوكيت فيه كرسي عام دايم يجلس عليه هوم لس انيق يلبس دايم جاكيت فرو ومثقف في نفس الوقت تلقاه يقرا جرايد .. بس نصيحة للبنات اذا مروا من عنده يحاولون يسرعون لانه مهبول .. اي بنت تمر قدامه يفاجأها بكاميرته ويصورها .. بس تراه حبيب ولاتستغرب اذا جاك وانت جالس وفتح باكت الدخان .. والفوكيت يقفل الساعة 2 في الليل .. وهو من المقاهي الغالية .. سعر الكابتشينو فيه يوصل الى 8 او 9 يورو والمويه 10 يورو!! (الله لايغير علينا بوفيهات الصناعيه والعصارات )
ومن المقاهي المعروفه هناك قهوة باريس Cafe De Paris وهالقهوة اكثر اللي يجونها اجانب وهي جنب الفوكيت … ويجي بعدها قهوة لو دوفيل Le Deville .. هالقهوة ماتسكر الا الساعة 2 في الليل .. تلقى غالبية اللي جالسين فيها حاجزين طاولاتهم من بدري (السعوديين بس!! ) .. مع العلم ان فيه قهاوي افضل منها بكثير .. بس هالعالم تعودوا ..
ويجي بعد الدوفيل ..تجي قهوة رينو Renault وهالمقهى راقي وهادئ في نفس الوقت .. وصاير داخل معرض رينو للسيارات.. جنبها على طول.
هاجن داز Häagen-Dazs سلملي على وهالمكان معروف عند كثير من الناس ببيع الايس كريم .. والجلسة في هالمكان تحلو في اخر العصر .. لدرجة انك بتلقى عليه سرا ناس يبون يجلسون فيه ..
وفي الجهة المقابله من الهاجن داز تجي قهوة الماريوت Marriottوهالقهوة في نظري انا من احلى القهاوي .. والسبب ان اللي يخدمون فيها نفسياتهم حلوه غير اللي في القهاوي الثانية ..وهي تقفل الساعة 12 في الليل … وتجي بعدها بمسافه قهوة اسمها مدريجال Le Madrigal هذا احلى وقت لها اول العصر .طبعاً المقاهي كثيره بس اللي ذكرته هنا اشهرها .
بالنسبة للمطاعم عد واغلط .. منها الفوكيت اللي تكلمنا عنه قبل شوي يوجد في داخله مطعم فخم لكن اكله بصراحه مهوب الى هناك … وفيه بعد مطعم ماسيون دي السياس MAISON D’ALSACE وهالمطعم من احلى المطاعم اللي تقدم المأكولات البحرية وبصراحه كل ما مريت من عنده لقيته فاتح مابعد شفته مقفل ابد بتلقى ناس كثير طالبين طبق مكون من ثلاثة ادوار ماكولات بحريه اشكال والوان ولكن مشكلتها انها نيه .. يعني لاتغلط وتطلبها والا بتبلش فيه مثل بعض الناس .. الله يديم النعمه … وفيه مطعم بيتزا بينو Pizza Pinoوهو تقريباً اشهر مطعم في الشانز اليزيه تلقى ربعنا مسنترين فيه من بعد الساعه 2 في الليل .. وقدامه مطعم بيتزا روما Pizza Rome وتقريباً نفس الاكل اللي عند بيتزا بينو.. عموماً غالبية المطاعم بالنسبة للمشروبات تلقاها ماتقدم الا اورنجينا والا كوكا كولا او كوكا لايت .. لاتبلشهم عندكم ببسي والا ميرندا والا مدري ايش … في الجهة الثانية من الشارع يوجد مطعم بلانيت هوليوود Planet Holywood والمطعم هذا ما اتوقع فيه احد مايعرفه .. لايفوتكم الفاهيتا عندهم تراه خطييييير …
مطاعم الوجبات السريعه المشهوره في الشارع هم ماكدونالدز McDonald’s ومطعم كويك Quek .. هذولا اللي اتذكرهم .. الباقي ناسي اسماءها او بالاصح مافيه امل اتذكرها .
نجي للفنادق .. طبعاً مافيه احد مايعرف فندق الماريوت Marriott.. وهالفندق صاير في قلب الشارع ولاعليه كلام … جنبه شقق فندقيه اسمها كلاريدج Claridge حلوه بس مشكلتها انها شوي قديمه .. لو سكنت فيها وصادف ان الجو حار تقدر تطلب مكيف للغرفه .. لانها تجي بدون مكيفات .. ولهواة الطبخ اطلبوا مواعين ولاتستحون .. خلوهم يجيبون المعاميل كلها وترا عندهم زمزميات للقهوة والشاهي … وهالثنين هم الوحيدين اللي في الشانز اليزيه .. لكن فيه حولهم فنادق كثيره منها : كاليفورنيا ، كلاريدج بولمان ، تشاتو فرونتناك ، ورويك ، وكونكورد لافاييت .. وهالاخير هو ابعدهم .. بينه وبين الشانز من 10 دقايق الى ربع ساعه مشي … وغيرها كثير
الصرافين الموجودين في هالشارع بتلقاهم منتشرين في كل جهه .. طبعاً يبيلك تشوف من احسن واحد فيهم سعر .. هالكلام في حالة انك جاي للبلد مامعك يورو .. وانا اشوف ان افضل اثنين هم اللي موجود المجمع التجاري اللي فيه فناك FNAC والثاني في المجمع التجاري اللي فيه بلانيت هوليوود .. والاخير يبيع بطاقات مكالمات دوليه … وبالنسبة لبطاقات اعادة التعبئه للجوال تلقاها عند فناك FNAC او عند اي محل يبيع دخان TABAC
خلصنا من الشانز اليزيه ومافيه من محلات ومقاهي ومطاعم ونجي للشوارع الثانية المشهوره في باريس
شارع جورج الخامس او افنيو جورج اسانك Av. George V
وياتي في قلب هذا الشارع الفندق العالمي الشهير فندق جورج الخامس Four Seasons Hotel George V واللي تعود ملكيته للامير الوليد بن طلال وهو من اغلى الفنادق في باريس وافخمها … وجنبه فندق برنس دو قول Prince De Galles … ويوجد في راس الشارع شقق الكاريدور وهي قريبه مره من الفوكيت …وقدامها محل يبيع ايس كريم خطييييييييييييير الظاهر ان اسمه بارادايس Paradise اذا ماني غلطان .. لايفوتكم الايس كريم عندهم ..مكتب الخطوط السعوديه في نفس الشارع ورقمهم مميز 0105006565.. وفي الشارع نفسه مطعم عربي اسمه وبقاله عربيه اسمهم الديوان .. اذا حنيتوا للاكل العربي مهوب يخالف تجون تاكلون فيه .. والمطعم صاير في الدور الثاني ويجي فيه غناء في الليل بس احيانا يبيلك تحجز قبل تجي .. وترا مافيه خربطه يعني مناسب للعوائل.. بس مشكلتهم اذا شافوك خليجي محطوك بفاتورة مهيب صاحيه .. يدخلون فيها طلبات ماطلبتها .. عشان كذا يبيلك تدقق في الفاتورة قبل تحاسبهم هذا … في الدور الارضي من المطعم فيه اكلات عربيه على السريع .. مثل شاورما وفلافل وكبه وانت ماشي .. وفيه بقاله عربيه …ومن المطاعم العربيه الثانيه مطعم نورا .. ومكانه في خلف فندق جورج الخامس وله فروع ثانيه في باريس …وفي شارع جورج الخامس مطعم حلو وفخم اسمه فندي FINDI وعلى ما اعتقد انه مايفتح الا في المساء ..في الشارع محل كبير لجورجيو ارماني .. وبوتيك فريه FERRE وفيه محلين حلاقه في نفس الشارع ( رجالي ونسائي ) ممتازين بس الله ياخذهم غالين .. حلاقة الذقن بس بـ 40 يورو والشعر بـ 60 يورو
يتفرع من شارع جورج الخامس شارع اسمه فرانسوا الاول rue Francois Ier وعلى هالشارع مجموعه من الفنادق والمطاعم منها مطعم العجمي (فرع للي عندنا في شارع الثلاثين ) .. وفيه شركة وبوتيك كارتييه Cartier … وفيه بعد بوتيك شوميه وزينيا وفرساتشي وغيرها كثير
في نهاية الشارع يجي شارع من العيار الثقيل اسمه افنيو مونتين Avenue Montaigne وهالشارع عليه افخم المحلات في العالم مثل شانيل، وهاري وينستون ، وروبرتو كافالي، ولوي فيتون ( بعض الناس يسمونه لويس فويتن ) وغيرها الكثير من المحلات الفخمة … ويتربع في وسط الشارع فندق بلازا اثينيه Plaza Athenee وهو من الفنادق الفخمة في باريس ( يعني اذا جلست في الفندق كنك راكب بنتلي )
وفيه شارع اسمه رو فوبور سان اونوريه Rue Faubourg St Honoré والشارع هذا يعادل الافنيو مونتين في الفخامة والمحلات اللي فيه تقريباً نفس المحلات في الافنيو مونتين الا انها اكثر هنا … وفي نفس الشارع فندق بريستول Bristol وهذا اغلى فندق في باريس .. يعني اذا مريت من عنده ناظره وصد كنك ماشفت شي
خلصنا من اهم الشوارع ومافيها من محلات وفنادق ومطاعم .. ونجي الحين للمعالم والاسواق الموجوده في اماكن غير الموجودة في الشوارع السابق ذكرها .
مجهود رائع اخوي بدر
يعطيك العافيه
والى الامام دايما
تحياتي
سنينـ الغرامـ
يعطيكـ العافية خيو على المجهود الرائع
ننتظر جديدكـ بشــــوق
تحياااااتي
هلا
بدر
تسلم الانامل
يعطيك الف عافيه اخوووي بدر على المعلومات بس الصوره بالمره مشوقه
شوقتنا نروح لها لكن للاسف؟؟؟؟
يعطيك العافيه على المجهود…
تحياااااااااتي وشكري الجزيل…
بدر الجنوب
موضوع في منتهي الرووعه ومعلومات قيمه
يعطيك العافيه
تحيتي لك
اسعدني مروركم كثيرا على صفحة صور باريس عاصمة النور والثقافة والجمال والاناقة والعطور
باريس
يسلمووووووووووو بدر على طرح باريس عاصمة النور والأناقة والعطور
فعلاان بآريس بلـد روعـه حقآ .
بلد الجمال و المنآظر الرآئعه .
بلد العطور و الانآقه .
نفسى اروح اعيش هنآآآآآآآآآآآآآآآآآآآآآك ن22
مشكور بدر البدور على الطرح يا عسل . 
روووووووووووعه وجمال واناقه
كل شي فيها حلوه
يسلمووو ايديك بدر
يعطيك العافية يارب
مودتى ~
باريس عاصمة النور والأناقة والعطور
يسلمووا بدر
