إنت ياللي لا تحـس ولا تحـن ولا تميـل
إنت ياللي تحسب إن قلبي مسيًس من حجـر
إنت يا راعي الكلام وصاحب البال الطويل
أشهد إنك غير في طبعك عن اطباع البشـر
لا تكابر.. لا تقول أبغاك من باب الجميـل
لا تجامل من عطاك ومن على شانك سهـر
والله إني ما طلبتك من غرامك لـو قليـل
ولا رجيت تموت فيً وما على بالي خطـر
إيه يمكن كنت جاهل كنت اعمي او هبيـل
كنت شاعر خط حرفه كل ما طيفـك عبـر
كنت أحس وكنت أحب وكنت أغير بلا دليل
كنت أبين بعض همي وأرمي الباقـي بالبحـر
كنت دمعك لا بكيت وكنت لهمومك أشيـل
وكل همي كيف أبلقى لقسوتك هـذي عـذر
باقي بقلبي مع إنك.. تجبر العبـره تسيـل
وتسرق الفرحه وتجبر عيني تغض النظـر
والله إني ما أبيعك وبالوصل ماني بخيـل
بس دامك قلت (إرحل) بعتبـر هـذا أمـر
إنت تامرني ولا لي من بعد أمـرك مقيـل
ما أبتغي شيٍ رفضته لو بموت مـن القهـر
لا تحسب اني ذليل ومنكسر وآنـا اصيـل
وقفتي هذي تعلـم مثلكـم معنـى الصبـر
وإنت دايم لا تحـس ولا تحـن ولا تميـل
ويوم حنيت إطعنتنـي كلمتـك هـذا قـدر