ببساطة شديده قصة يوميه يمكن يتعرض لها اي شخص
اخونا صاحب القصة يرويها لي ونا حببت ان اكتبها من بداية السطر الذي يقول فيه
عندما تجاوزت مدينة المجمعه متجها للرياض بعد قضائي اجازة نهاية الاسبوع عند ابنائي وفي يوم الجمعة وتمام الساعة السابعة ليلا وجدت سيارة متعطلة على جانب الطريق .
ومن هنا طلبت منه ان احكيها بلسانه بطريقتنا المحببه وهي السرد باللغة العامية اللذيذه
يقول اخونا وانا اشوف هاك السواد اللي متجمع على السيارة وانوار تأشر ماادري وش السالفة واهدي واخذ كتف الطريق ( يعني نزلت على التراب في غير وجيهكم ) وتوجهت للسيارة المتعطلة
قفلت النور العالي وتركت النور الخفيف والا السواد هم نسوان متجمعين على السيارة ويستخدمون جوالاتهم عشان ينورون للرجال الوحيد في المجموعه ( اكيد والا على بالك ان الحريم يسوقون السيارة )
هديت ويوم قربت منهم فروا الحريم وراء السيارة ووقف الرجال في العشرينات من عمره
قلت له السلام عليكم
فجاءة رد علي رد غير متوقع
طبعا ماقال وعليكم السلام
قال وش عندك هنا
انصدمت لحظة
السلام سنة ورده واجب
بسرعة بديهه قلت لازم اعطيه درس من هالموقف
قلت ابي اوقف واستريح هنا عندك مانع
شفت على وجهه الصدمه اللي ظهرت على وجهي قبل شوي
تردد وقال ياخي ماتشوف ان فيه عوائل روح دور لك مكان ثاني
قلت العوائل هناك ببيتكم والا باسواق وحدايق الرياض ( الاخ يعرف يدق على اسواق الرياض مبهذلينه كل مانزل السوق قالوا عوائل ) هذا طريق عام واوقف مكان ماابي
طبعا مع الصدمه جاه سكوت غريب ماقدر يقول شيء
المشكلة ماهي فيه المشكلة كانت في زاوية السيارة المتعطلة
حرمه كبيره لكن ماشاء الله عليها صحتها زينه كانت مركزه في الحديث اما البنات ( ماادري اربع او خمس ووحده كان معها ولد عمره تقريبا ثلاث سنوات ) كأني اشوفهم متمسكين بايدين بعض وراء السيارة
المهم نرجع للخير والبركة شيبان وعجائز
بصراحة كنت بطرف عيني على هالعجوز الي بالطرف ولا ودي اني اسبب خلعه للعجوز وللبنات لكن ودي اعطيه درس
المهم بعد ماقلت العوائل ببيتكم الا والعجوز تنزل على الارض وتأخذ هاك الحجرة اللي لو حذفتها علي كان ياما كان واحد نزل عن الطريق وراح فيها
كنت اسرع منها ووجهت الكلام لها قلت :
لاتخافين ياعمه ماوقفت وانا صاحب نيه رديه شفتكم على الطريق متعطلين ولا عندكم نور ونزلت اساعدكم لكن ولدك ماادري ابن اخيك هذا الله يهديه بدل مايرد السلام واجهني بها الرد اللي يزعل الواحد
هدت الحمد لله واحلي مافيها رمت الحجره بعيد عنا وعرضت السيارة على الكفر العطلان ووقفت ونزلت وسلمت وكانت العجوز قريبه منا
قلت ياعمه انا معي قهوة وشاي وفراش ابي انزلها لكم خلف سيارتي وخذوا راحتكم لحد مانصلح السيارة
فرشت الفراش ونزلت القهوة والشاهي وتوجهت لصديقي ( هههه الحين صار صديقي ) وجلست العجوز مع البنات خلف السيارة
بصراحة انا انسان ماخذ الدنيا بسط اخر همي الدنيا عايش وماخذ الدنيا تساهيل
وحنا انا وصديقي نشتغل بالكفر قمت اسولف ( عاده مايخليها ) واضحك وبصراحه انها عاده مالي فيها قصد ثاني
درن درن درن درن
الجوال يدق وكنت مشغله على بلوتوث السيارة وهو بجيبي المهم طلعته وكانت يدي وسخه من الكفر ضغطت على مفتاح الرد بطرف يدي
اخخخخخخخخخخخخخخخخخخخخخخ
وين الصوت
الصوت على ميكرفون السيارة والقزاز فاتح يعني تفشلنا
هههههههههههه لا ماتفشلت كان ولدي الله يصلحه
المهم اقول الو وهالولد مهوي ( يعني وين يطلع اكيد لابوه كلهم رايحين فيها )
الولد يتكلم :
السلام عليكم ورحمة الله وبركاته
عزيزنا العميل نفيدكم بان ابناءك قد اتموا المذاكرة ويستعدون للنوم فلا تنسى الدعاء لهم شاكرين لكم حسن تربيتكم
هذا الولد مستخف دمه وانا حايس بها الجوال ابي افصله من بلوتوث السيارة وفزع صديقي واخذه وهو ميت من الضحك والمشكلة ماهي فيه في العالم الثانية ماسمع غير ككككك ككككك كككككك
المهم ماقصر ( يعني ماهو بالحيل ) فصله من السياره وشغله على المكرفون ( كانك يابو زيد ماغزيت )
ابي اتدارك الموقف قلت ياولدي الله يهديك ماني فاضي لك بها الوقت
رد وقال ياخي ( ابوه ويقول لي ياخي ) لاني ديمقراطي المهم قال ياخي كلها دعوه والله البخيل خلاص لاتصرفني كلها بصلاة الفجر وابسط قدام المسجد دققتين وارجع بعشرين دعوه
اخخخخخخخخخخخخخخخخخخخخخخخخخخخخخخخ
طبعا وقفت وقمت ادور جوالي وين طاح لان الشاب اللي بجنبي كان ماسك الجوال لي وطاح على ظهره من الضحك وال ككككك كككككك كككككك مستمره طبعا
لقيت الجوال وانهيت المكالمة واستمرت الحاله على الضحك والفكاهه وانا اجيب هالسالفه وراء السالفة لحد ما انتهينا من تصليح السيارة
قاموا من عند السيارة وغسل الشاب يديه وانا توضيت وقلت الله يستر عليكم امشوا وانا بصلي العشاء والحقكم وامشي معكم لحد الرياض ( ماعندهم كفر احتياط )
مشوا واقمت الصلاة وصليت والله اعلم بصلاتي جاتني دوخه من ريحة العطورات اللي كانت على الفرشة واذا سجدت ماعاد ودي اقوم استغفر الله
وانا اصلي الا فيه صوت سيارة
قلت في نفسي هذا واحد شافني اصلي وبيصلي معي طولت بالركعه ماجاء المهم كملت صلاتي وانا اسمع السيارة شغاله ولاسمعت احد فتح باب السيارة
انتهيت من الصلاة والتفت الا هذا اليكون الذهبي حق صديقي هههههههه
نزل وسلم ( صار اخلاق الحين ) هههههههه رديت السلام قال هذا جوالي وهذا جوالي اخوي الكبير وحنا حضرنا عرس بالمجمعه البارح وراجعين الرياض لكن لازم تعطيني رقم جوالك وتزورنا ضروري بالرياض
طبعا انا عرفته بنفسي وحنا نصلح السيارة
قلت ان شاء الله اذا سمحت الظروف
مشينا سوا على الطريق
طن طن طن طن
الجوال رسالة فتحتها
السلام عليكم كيفك
رقم مااعرفه
قلت بخير من انت
قال انا اللي قدامك الحين
ارسلت ضحكه وقلت هههههه اكيد جني ( اسم الله علينا )
ارسل ضحكه وقال الله يسامحك
ارسلت لاتزعل بصراحه انا مسافر الحين وعلى طريق الرياض ولا قدامي غير هالظلام الاسود وسامحني
طن طن طن
صح عليك مركز مع السالفة
رسالة قال فيها من جد ماعرفت من انا الى الان
ارسلت ( ياليل الليل كم رسالة الى الان من خمس وعشرين هلله كم طلعت ) لا ماعرفتك وبصراحه اقلقتني من انت من الاخر
طن طن طن
خلاص عرفنا رساله
انا فلانه اللي بالسيارة اللي قدامك واخذت الرقم من البلوتوث اللي كان شغال
اخخخخخخخخخخخخخخخخخخخخخخخخخخخخخخخخخخخ
انا حاط الرقم على اسم البلوتوث وكان شغال اقتران مع السيارة
( يعني ترقيم عيني عينك ) اي ترقيم احد يرقم بالطرق السريع
وهنا نهاية القصة
مارديت بعد هالرسالة اكيد وحده من هالبنيات اللي كانوا مع العجوز
الرسايل ماانقطعت الي الان وهي تصل ومن ضمن الرسايل صورتي وانا اشتغل بالسيارة ( ماادري كيف لقطتها )
توقفت لحظة مع نفسي ( القلب خضر ) يعني هالبنت يوم اتصلت وانا على طريق سريع هو من حظي اللي يكسر الحجر ( قولوا ماشاء الله ) او هو عمل شيطاني من ابليس اللعين يبي يضيع علي الاجر لاني وقفت لوجه الله عشان اساعدهم .
وتوقف صاحب القصة عن الكلام وانا اضفت له كلمة ( بصراحه ماادري هو حظ او عمل شيطاني )
وسلامتكم
وتوقف صاحب القصة عن الكلام وانا اضفت له كلمة ( بصراحه ماادري هو حظ او عمل شيطاني )
مايختلف اثنان انها مكيده شيطانيه
تسلم على السرد الممتع
تقبل مروري
على القصه ……اكيد مكيده شيطانيه … وتقبل مروري..
وعليكم السلام ورحمة الله وبركاته
يعطيك العافيه
تحيتي
طن طن طن
للاسف الجوال مفصول عن الخدمة له سنة ههههههههههههه
قصة رائعة بس مو واقعية
تقبل تحيتي
يسسسسسسسسسسلمو على الطرح الجميل
تسلم الايادى
تقبل مرورى