لا صار خلك مستحق المسبه—سبه تره العشاق غيرك يسبون
لا ابوه لا ابوه الحب من قلب سبه—-لابو الغرام الي يحدك على الهون
يالعن ابو قلب غشيم يحبه–ملعون والقلب اللي يغليه ملعون
اقول من هباك يا خبل هبه—الدون ما يسلك معاهم سوى الدون
عز الجفا ولا هوان المحبه—-ماخوذ من يصير على الذل مغبون
أظهر قواة البأس والضعف خبه—ترى الضعيف ضعيف لا طعم لا لون
الراس محد يقطعه غير ربه–اقول عز النفس ما اقول لك هون
خله يولي لاي ذلك بحبه—ابعد وتلقاهم على البعد يدنون
والا انت لو ترقد وبالعين شبه—ابرك من اللي يجرحونك ويسلون
يا جاهل افهم خذ من العلم لبه—اصبر وتنسى والعذارى ينسون
الرجل عقله دائما في قلبه—ماهو عمى بالقلب ومفتح عيون
لا قدموا حبه تقدمت حبه—وان وخروا وخرت والعز مضمون
ترى غلا هالوقت هبه وهبه—اغنم هبوب الريح لا تقلب سكون
لاساعدك حظك تغانم مهبه—لا ترتهي يجيك يوم وتصدقون
قبل يذبك ناب الارداف ذبه–ترى حلاة الرجل طاعن ومطعون
كم عاشق خلوه من غير سبه–يصفق بكف كف ما يدري وشلون
ماله جدى ياكود دمع يكبه—عليه سيف الهجر والصد مسنون
هذا من اول يوم لو دل دربه–ما دش في دنيا المجانين مجنون
لكن تبع قلبه وقلبه لعب به—واليوم يبغي عون ما حصل عون
روض فرادك يا ابن الاجواد ربه–البيض ما يصلح لهن كود فرعون
والا ضعيف النفس دايم مسبه—ودك مساكين البشر ما يحبون
بارك الله بك , شكراً أخي الكريم