() 2024.

(( دولة غلا ))

ما يقتصر حّبي على بعض ما فيك
……………. و لا ينحصر في اللي عيوني تشوفه

ماحد(ن) في زينك يا حياتي يضاهيك
………….. يصعب على الشاعر و غيره و صوفه

أنتي القصيدة اللي أجذبتنا قوافيك
…………….. و بداخلك أسمى المعاني معزوفه

ما أقول غير الله لخلك يخلّيك
……………. و تبددي ببسمتك حزنه و خوفه

و الله يسدد في المحبة خطاويك
……………. و لو يشهر العاذل بوجهك سيوفه

يا مكرمتني ليتني أقدر أوفيك
……………. حقّك و أنا مقصّر معك يا عطوفه

يا وافيه وش كثر حلوة مباديك
……………. لا ما على الدنيا بدونك حسوفه

منتي بمحتاجة " لناديك يناديك "
……………. و لاّ من الجمهور جنبك وقوفه

من شعرك لوجهك لجيدك لأياديك
…………… لصوتك و همسك و البقية معروفه

كلك على بعضك جميلة و يكفيك
…………… اسمك يضّوي الكون بأربع حروفه

و يكفيني انّك قلتي حضني يدفّيك
…………… و سجّل عمرك يملي اسمي كشوفه

من فوق زين الشكل طبعك يحّليك
…………… يا طاهرة يا طيّبة يا رؤوفه

يا ملبيتّني لو في نفسي أناديك
…………… و ربي كرم حاتم بشخصك أشوفه

أن جيت صوبك قلتي ربي يحّييك
…………… و آن رحت عنك قلتي يالله تروفه

يا ما بلا ترتيب سابق ألاقيك
…………… و ألقاك مثلي للتلاقي شغوفه

دولة غلا و كل الحلا في أراضيك
…………… و من مرّ في حسنك أبد ما يطوفه

و لو نفترض سافر و خلاّك بيجيك
…………… ما تهزم العاشق شقاوة ظروفه

يضحك زماني يوم أشوفك و أحاكيك
……………… و أن غاب زولك قمت أحاكي طيوفه

و لو يرجع الموضوع لي ما أخلّيك
……………… يكبس عليّه النوم و لجلك أعوفه

صآ‘دق آ‘لمشآ‘عر (uu11