ياراحتي لو وزعتها على كل خلق الله كفتهم هذا السبب ! 2024.

السلام عليكم و رحمة الله و بركاته

..

يا راحتي لو وزَّعتها على كل خلق الله كفتهم .. !! هذا السبب .. !!

موضوع أثر فيني و حبيت تستفيدو معاي
لا تقولو الموضوع طويل صدقوني بيغيركم كثير
^
^
^
^^ما ضرَّني الزمان بـ شي ..
ولا أحـد يقدر يضرَّنـي , دام روحـي عَلَت عند رب البريَّة ..

ضاقت صدور كثيرة , و تألمت أرواح ..

تمنيتي يا أختي تلقين أحـد يفهمك , يحس فيك ..
يفهم شعورك و اللي بقلبك بدون لا تحكين .. !!
دوَّرتي مالقيتي .. !!

إنتِ مالقيتي .. بس أنا لقيت .. !!

..

تأمَّلت في السماء و الأرض , قوَّيت علاقتي بـ خالقها ..

كنت و أنا صغيرة ألوم نفـسي لا سهيت بالدنيا و نسيته .. !!
كان لي عادة ..(( أذكر ربـي )) , و (( أجعل لي وقت لله ))..

كبرت , و كبر حبي له ..
ما أقولها تزييف ..

..

أحب الشعر و القصايد بس بـ نفس الوقت أكرهها ..
تدرون متـى .. !! .. لا خلت من ذكره .. !!
سبحانه و تعالى ….

أحب القصايد اللي تحكي عنه و عن جلاله و عظمته
أحس بـ إرتياح لا كتبت عنه و ذكرته سبحانه

أحب اللي تهديلي قصايد عن رب العالمين ..
قصايد تذكره و تسبِّحه .. ( أحس بإرتياح و الله )..

خليت حياتي سهلة , بسيطة , عاديِّة .. !!
بلا أي تَكَلُّف ..
خليت تفكيري بما بعد الحياة الدنيا ..
خليت تفكيري بـ ..(( الجنة ))..

لـ درجة صرت أحب أسمع طاري الآخرة و الحساب و الوقوف أمام الله
أحس بـ شوق .. !! و الله يا بنات أحس بـ شوق و سعادة .. !!

صدق الخوف لابد منه , بس و الله أحبه و أتمنى أشوفه ..
مادري ليه .. !! , لا سمعت هـ الطاري يحن قلبي و تتسارع نبضاته ..

فعلاً موقف مهيب .. !! , بس أحب ربي , و أتمنى أشوفه .. !!
هل على هذا من لوم .. !!

و الله الراحة اللي غمرتني , مو أنا سببها ..
و لا أنا اللي عطيت نفسي إياها , و لا هو بـ فضل أحد من خلق الله ..
لا .. !!
هذا من فضل ربـي , لأن تفكيري ما صار في حد واحـد .. !!
ما صار في شي واحـد , لا .. !! .. رحت بعـــــــــيد ..
بعيد بعيد بعيد .. !!

قلبت حياتي فوق تحت , غيَّرت تفكيري , ربَّيت نفسي بـ نفسي ..
و القرآن علَّمنـي , و حب الله أحياني ..

و مع هذا و الله و قسماً بـ الله صارت روحـي أحسن من أول .. !!
صار تفكيري مريــح , و الله يا بنات لا صار لي مشكلة .. عادي .. !!

أقول في نفسي : هذه هي الحياة الدنيا , أنا أملي هناك .. في الجنة ..
الدنيا ما باخذ منها شي , و لا بستفيد منها شي ..

لو أسكن في خيمة , و الله ما همني , دام جنتي في صدري ..
و رب العالمين معـي ..

حطيت في بالي , إن الله فوقي , و يشوفنـي , و ينظر إلى قلبي ..
و يعلم ما يخفيه صدري ..

صرت أقـول لـ نفسي : يا خـلود ربِّك قادر على كل شي ..

أناظر للسما و أقول بـ كل يقين :
..(( مثل ما خلق ربي هـ السما قادر يخلق لي الفرح و الحب
و السعادة و الإنشراح ))..

أناظر للبحر و أقول بـ كل يقين :
..(( مثل ما خلق ربي هـ البحر و أخفى الدرر فيه
قادر يطهِّر قلبي و يرزقه ما هو أغلى من الدرر و الجواهر " حب الله " ))..

صارت نظرتي حلوة , لأن الله حلاَّها ..

أناظر يميني و شمالي , أناظر فوقي و تحتي , و في كل إتجاه ..

و الله يا بنات تغيَّرت نظرتي كثير لـ درجة حبّيتها .. !!
لأنِّي ربِّيت نفسي , تكره كل ما في هذه الأرض الزائلة و تحب الله ..
و إذا أحبَّت الله ..
تحب كل ما في هذه الأرض الزائلة من كائنات حية الله هو خالقها ..

دامي حبيت ربي , أكـيد بـ حب كل شي خَلَقَه و أبدع في خَلْقِه ..
ما يضيق صدري على شي في الدنيا .. !!

ما أهتم بالموضة و لاني من مجانينها أبداً ..

لأن الله جميل , أحب ألبس ما هو جميل فقط و ساتر .. !!

ما ألحق الموضة , حتى لو كان فيها تَفَسُّخ ألحقها .. !! لا ..
ما أقلِّد أي أحـد , و لا أتجنن على مشاهير و فنانين أبداً أبداً أبداً ..

مستحيل و يستحال أفكِّر أحب أحد منهم , أو أميل له ..

إذا ناظرت في أحد منهم , أناظر لـ قلبه .. و أفعاله .. و أخلاقه .. !!

ما أفكِّر إلاَّ بـ شي واحد : ..(( اش مصيره بعدين .. !! )).. !!
هل رب العالمين راضي عنه .. ؟!
و هو يعصيه .. لا .. و فوق أرضه .. و تحت سماه .. ؟!

..

في كل حركة أفكِّر بـ الله , في كل قول أفكِّر فيه ..
إن دعيته بـ شي .. !!
أضحك و ابتسم .. أحس ودي أضحك من كل قلبي ..
تدرون ليه .. !! << لأني متيقنة من الإجابة .. !!

مستحيل يتغلغل اليأس في قلبي , من ربي .. !!

لأني أقول لـ نفسي كثير ..
..( إن الله لا يعجزه شيء في الأرض و لا في السماء )..

يعني معقولة يا بنات أقول هـ الكلام و لا أطبِّقه في نفسي .. !!
أقوله و لا أتيقَّن منه .. !!

إذا ربي خلق السماوات و الأرض , و استجاب الدعوات و غفر الذنوب ..
بـ الله عليكم , ما بيقدر يستجيب دعوات مخاليقه .. !!
أجل ليه الألم و التعب و اليأس و الإحباط , و الشعور بالوحدة .. !!

..

ما أحس بـ الوحدة أبداً إلاَّ إذا أغضبت ربي ..
ما أحس بـ تعب و ضيق و خوف و ألم و رغبة في البكاء ..
إلاَّ إذا أغضبت جبَّار السماوات و الأرض ..

اش لي بالحياة , دام خالقها غضبان منـي .. !!
و اش هي معنـى الحياة , إن ما فكَّرنا بـ خالقها .. !!

..

ألوان الحياة و بهجتها لا تكتمل أبداً و لا يكتمل رونقها
إن لم تُسَبِّح بـ حمد الله و تذكره ..

..

فرحتك و سعادتك و إنشراحك يا أختي لن تكتمل إلاَّ إذا ذكرتي ربَّك
حياتك ما راح تكون في كامل حلاتها لو خَلَت من حب الله..

أقولكم شي .. !!
من عِظَم يقيني بـ كَرَم جَبَّار السماوات و الأرض
صار لي موقف قبل فترة , و الله ما أنساه أبداً

صرت أحلم كثيـر بـ الله و بـ خلقه و مخلوقاته و الكون و السماوات و الأرض
أرتاح جداً جداً لا صحيت من النوم , و أنا استرجع اللي شفته

أنا غبت عن المنتدى حوالي 3 أسابيع .. !!

سافرت للجـنوب .. و الحمد لله على كل حال ..
صدق تعبت و أحس بـ تعب في جسمـي إلى الآن .. ما أدري ليه .. !!
<< ما أخفي هـ الشي لأني تعبانة لـ درجة صار مالي نفس أكتب مثل أول
ظهري قايم عليّ و كل عظمة في جسمي , بس إن شاء الله أجر و تمحيص

ما يكفيني في أيامي اللي سافرت فيها إلاَّ المواقف اللي حصلت لي و الله ..
يكفيني , كيف كانت علاقتي مع ربي , و أنا و الله ما أقولها رياء ..
الناس ما راح تفيدني بـ شي يوم الدين , ما راح يفيدني غير ربي ..
قسماً بـ الله ما أقولها إلاَّ لأجل يسكن قلوبكم اليقين .. !!
أبي اللي حسيت فيه و ربي و ربي و ربي تحسون فيـه .. !!

قبل لا آخذ العمرة في رمضان << و هـ القرار جاء مفاجئ ..
دعيت ربي من صميم صميم صميم قلبي ييسر لي ختم القرآن
لأني كنت خايفة من ( الدورة الشهرية ) ..
ما أبيها تجيني و أنا بروح العمرة ..
و الله لـ يقيني التام بـ قدرة الله على كل شي

الحمد لله أخذت الحبوب اللي تأخِّرها مع إنه كان عندي إحساس
إنها ما بنتزل عليّ بس أخذتها احتياطاً و ما خفت منها صدق تردَّدت
بس قلت : ربي حاميني , ليه أخاف .. !!

ما تصدقون شعوري قبلها كيف و أنا أختم بالجزء و الجزئين
و الثلاث و الأربع و الخمس .. في لحظة وحدة .. !!

لا تظنوني أقراه بـ سرعة الصاروخ بلا تأمُّل و لا تدبُّر .. !!
بالعكس .. !!

أعتبر قرائتي في ذاك الوقت من أفضل قرائاتي لأني تدبَّرت بـ شكل قوي
عشت جو القرآن و حسيت بـ راحة و سعادة و أنا أعيشه .. !!

قاعدة أتفكَّر فيه .. لـ درجة أمشي بالصفحة و الثنتين و العشر ..
و ما أدري عن نفسي إلاَّ و أنا واصلة الجزء الثلاثين .. !!

قاعدة أناظر مو مصدقة .. !!

تو كنت في الجزء العشرين .. !!

فعلاً فعلاً فعلاً , اليقين بـ الله , جاب نتيجة مُذهِلة ..

ممكن ما تحسون بـ اللي حسيت فيه أنا .. !!
ولا راح تحسون بإحساسي , لأني جرَّبت و عشت في الحقيقة .. !!
ربي استجاب دعاي و جَبَر بـ خاطري و ختمته في 22 رمضان
و انا اقرا الجزء الثلاثين خلصته في دقائق

و الله يا بنات و أحلف لكم بـ الله إني قرأته بـ تدبُّر

بس ربي استجاب دعاي يومي دعيته ييسِّر أموري و يعينني على ختم القرآن
و فعلاً ختمته و حسيته مثل الموية الباردة على صدري و أنا اختمه

هذه دعوتي الأولى و استجابها لي خالقي يومه عَلِم بـ يقيني بالإجابة

و دعائي الثاني بعد اليأس اللي دَبْ في قلبي
كنت ناوية اعتمر مع أمي و خالتي في العشر الأواخر من رمضان
و دعيت ربي من صميم قلبي في صلاة التراويح
ما جا اليوم الثاني في وقت الفجر ( وقت السفر )
إلاَّ و أخوي قالي جهزي نفسك

ضحكت و استانست و استبشرت خير و قلت هذا من فضل ربي
استجاب لي بعد ما يأست من الروحة لـ ظروف

بس كان ربي أكبر من يأس يتغلغل في أرواحنا .. !!

سافرنا و وصلنا , و دعيته ربي ييسِّر لنا العمرة و ما يكون فيه زحمة
و فعلاً ما كان فيه زحمة أبداً , و كان كلام الناس عن الزحمة مجرد ثرثرة

لأن ربي أكبر و قادر على إعانتنا .. !!

رحنا الصبح و كان بإمكاني و الله أروح للحجر الأسود
ربي ميسِّر لي العمرة سبحانه

و الله يا بنات أحس الناس تفسح لي الطريق
ما تمرّ في المكان اللي أمر فيه
و أنا أمشي سيدة أحسّهم يلفون يمين و شمال
كان الطريق ميسَّر سهل و الله

حسيت بـ راحة و ابتسمت من صميم قلبي ابتسامة ما عمري ابتسمت مثلها
ولا عمري حسيت بإنشراح قد ما حسيته في عمرتي هذه
كله من ( اليقين بـ الله و تعلُّق القلب به و حُبّه ) ..
حتَّى في السعي , أحس الطريق بااارد و وااسـع ..
أمشي بكل راحة , صدق فيه زحمة , بس أحس الطريق ميسَّر لي ..
يوم سجدت قدام الكعبة , حسيت إن هنا ربي موجود و قريب أكثر ..
حسيت بإنتماء لـ هذا المكان الغالي غلاة الروح و الله ..
كل ما قرَّبت من الكعبة , أحس بـ راحة كبيرة ..
راحة لو توزَّعت على كل خلق الله كفتهم ..
إحساس ( إن الله قريب منـك و يسمعك ) ..
دعيته من كل قلبي , بس مو لي ..
في هذا المكان و الله نسيت نفسـي و ذكرت خواتي اللي هنا في المنتدى ..
نسيت أدعـي لـ نفسي , لأني من حبي لله حبيت خلقه و دعيت لهم ..
يـ الله بس تستجيب لي و تفرِّح قلبي .. !!

إحساسك بـ حُبِّك لله , يغمر قلبك بـالحب لكل شي , للناس و للحياة ..
تحسين فعلاً إنه فيه حياة , و فيه حياة ثانية بعد حياتنا هذه .. !!

فيه حياة آخروية , لو كنتي من الفايزين فيها و سكنتي الجنة ..
هناك أقول : ..(( وداعاً للتعب )).. !! ..(( ادخلوها بـ سلامٍ آمنين ))..

..

مثل ما قلت لكم , من كبر يقيني بـ الله ..

في يوم من الأيام , صحيت من النوم ..
و قلت في نفسي : راح ينزل اليوم مطر .. و الله بينزل .. !!
و شوي شوي أحس يقيني بدى يكبر .. !!
رحت شفت الجو في وقت العصر كان مشمس و حار ..
على هذا ابتسمت و أحس يقيني كبر ..
قلت : بينزل مطر إن شاء الله ..
و من قوة اليقين كأني أنا اللي بنزِّل المطر ..(( استغفر الله ))..
و فعلاً , نزل مطر , بشكل قوي .. بس حلو ..
انقطعت منه الكهربا 4 ساعات متواصلة ..
و ابتسمت من كل قلبي حينها و قلت : سبحان اللي عطاني هـ اليقين .. !!

فعلاً و الله , أحيان تجيني حالات فجأة , أحس بيقين بـ حدوث أشياء ..
تحدث فعلاً .. !!

كل هذا من فضل ربي , كل هذا لأني بعت الدنيا و شريت راحتي ..
و راحتي هذه هي بـ معرفتي لله , و حبي له ..

تفكَّرت بالمخلوقات , تفكَّرت بالناس .. و كيف إن ربي خلقهم ..

قلت سبحان الله , إذا هذا الخلق العظيم بـ هذا الشكل ..
إذا هذا خلق الله الجميل المُبْدِع , فـ كيف به سبحانه ..

يومي أتذكَّر إننا في الجنة ( أسأل الله أن نكون من أهلها ) ..
و نشوف ربنا سبحانه , أحس بـ رااحـة و الله ..
أحس فعلاً بـ جمال كل شي في هذه الأرض ..

يوم أناظر بـ الجبال و الخضرة و أسبِّح ربي إذا شفتها أحس بـ شعور غريب ..

مثل الماء الصافي المنساب من أعلى الجبال إلى باطن الأرض ..
كـ الراحة و السعادة تنساب من فاطر السماوات و الأرض
إلى جوفي و قلبي

سبحان الله

..

أختـي أخي

تبين تحسين فعلاً بـ معنى الحياة

وينك من قوله تعالى :
..(( قل سيروا في الأرض فانظروا كيف بدأ الخلق
ثم الله ينشيء النشأة الآخرة إن الله على كل شيء قدير ))..

ما عمرك تفكَّرتي بـ خلق الله ..

صدقيني , راح تشوفي نفسك جداً ضعيفة و بـ حاجة لـ ربك و لـ رحمته ..

صدقينـي , إذا تأمَّلتي بروحك و قلبك و عقلك , و سبَّحتي ربِّك ..
راح ترتاحين بإذن الله ..

صدقيني , التأمُّل و التدبُّر بـ خلق الله يُشْعِر بالراحة و السعادة ..
تحسين فعلاً بـ راحة في حياتك ..

هذا ربِّك , هذا العالم فيك , ما خلقك و تركك للحزن و التعب .. !!
خلقك و رزقك , لا تظنينه ناسيك .. !!

سبحان الله , نيأس من إجابته لـ دعائنا , و هو القادر على كل شي .. ؟!
سبحان الله , نسعى لإرضاء الناس , و ننسى حاجتنا لـ رضاه .. !!

سبحان الله , سبحان الله في كل وقت و كل حين .. !!

و الله يا بنات لو تدخلون جوَّات قلبي و تحسون بـ اللي أحس فيه
بـ تعذروني لو كثَّرت حكي هنا , لأني ما أدري كيف أوصف لكم شعوري

و الله يا بنات أشوف الدنيا و أشوف ناسها مثل بعض ..
ما أشوف شي غير عن شي , ولا شي أحلى من شي ..

إن قالولي فلانة أحلى من فلانة , أقول : الله أحلى و أجمل ..

أشوف رب العباد أحلى من الدنيا و ما فيها
أعظم من الدنيا و ما فيها

و الله يا بنات يوم غيَّرت تفكيري , و ابتعدت عن الدنيا شوي ..
حسيت فعلاً بـ راحة و صفاء نفسي ..

لأني حاطة في بالي إنه ما فيه شي بالدنيا أحلى من خالقها
ولا فيه شي بالدنيا بيسحرني و يسحر فؤادي غير ربي

تحتاجين يا أختي للحظة صمت و هدوووء ..
تجلسين فيه لـ حالك , في غرفة هادية ..
تغمضين عيونك , تتخيَّلين نفسك في أرض خضراء وااسعـة ..
تسمعين صوت العصافير , تتخيلين تغريدها تسبيح لله ..
و تتخيلين صوت خرير الماء ذكر لله و تمجيد ..
و تتخيلين بعد صوت الهواء و الأشجار ذكر لله سبحانه ..

صَفِّي قلبك و نيَّتك
تشوفين الدنيا محلوَّة بـ الله و بـ ذكر الله ..
بـ الله وين الحلا في غير ذكره .. !!

..

هو خالق الجمال , رب كل شي و عظيمه .. !!
أعظم و أكبر من أن يَدُبّ اليأس و القنوط من رحمته في نفوسنا .. !!

سبحان الله .. إن تفكَّرتي في خلقه و إبداعه و رحمته ..
راح تحسين فعلاً بـ حُبِّه ….

بـ الله عليك جاوبيني , ما تحسِّين نفسك مقصَّرة مع ربِّك .. !!
ما بَخَل عليك سبحانه بـ شي و إنتِ اللي محتاجة له ..
و فوق هذا تعصينه و على أرضه و تحت سماه ..

..

أحيان أحس ما أقدر أرفع راسي للسما و أتأمَّل نجومها و قمرها و شمسها ..
أحس ما أقدر أرفع راسي من الأرض , لأني مذنبة .. !!
مُقَصِّرة في حق الله , إيه و الله مقصِّرين ..

..

سبحان الله , في لحظات دعائي له ..
أحس بإنشراح , و كأن شي بارد يسري في جسدي ..
و خصوصاً كتوفي .. !!

بعد ما أتيقَّن بالإجابة .. لأن اليقين لابد منه ..

صرت كل ما أقرا آية أو أسمعها ينبض قلبي بـ صورة قوية
مثل الإنسان لا مَرّ قدَّامه شخص غالي و حبيب فجأة .. !!
أكـيد لحظتها بـ تتسارع نبضات قلبه و يبتسم .. صح .. !!

هذا شعوري , لا مرّ ذكر الله , ولا سمعت أحد يقول :
..(( لا إله إلاَّ الله )).. من صميم قلبه ..

لأنه فعلاً يا خواتي , ما فيه إله غير الله , و لا مجيب لـ دعواتنا غيره .. !!

..

راحتـي اللي انعم علي بها ربي , هي لـ معرفتي و يقيني به ..
فقط .. !!
كـوني مؤمنة بـ الله , و مؤمنة بـ عظيم كرمه و فضله و قوَّته ..
وقتها يا أختـي , حطي يديك و رجليك في موية باردة ..
و خصوصاً قلبك , حطيه في موية مثلِّجة .. !!

لأن قرب الله راحـة , أكيد لا قربتي منه , و رُزِقتِي حُبَّه ..
راح ترتاحين و يرتاح قلبك ..
و بـ تهون عليك مصائب الدنيا و بلاويها ..

راح تشوفيها بـ مثل ما أشوفها أنا ..
تمرّ فيني مشكلة , ولا أخاف , لأني أقول : ربي بـ يعين ..
و فعلاً .. ألقى ربي أعانِّي كثير ..

لقيت عون الله , يوم تخرَّجت من الثانوي و انقبلت في الكلية ..
كنت باااردة و هااادية , و لا كأن الجامعة هامَّتني ..
اللي يشوفني يقول هذه ما همَّها الدراسة ..
..(( ترى هذه عادتي , ما أهتم كثير لأني وكَّلت أمري لله و واثقة فيه ))..

لأنهم يظنون اللي تهتم بالدراسة لازم تتضايق و تخاف و تبلش عمرها .. !!
ظنُّوا إني ما راح أنقبل .. !!

ما قلت لهم عن اللي بداخلي من يقين بـ الله .. !!
..(( ما خفت ولا أهتمِّيت , لأني كنت واثقة بـ ربي ))..
ارتحت و ريَّحت قلبي , و لا تضايقت , لأني مؤمنة بـ قضاء ربي و قدره ..

و فعلاً انقبلت و دخلت الجامعة ..

ابتسمت وقتها , و زاد يقيني بـ الله أكثر و أكثر ..

طلعت من صمتي شوي و قلت للي حولي :
..(( اقضوا حوائجكم بالكتمان ))..

لأنهم متعودين مني أسكت ولا أبيِّن أي ردَّة فعل أبداً .. !!

أكيـد .. !!

ما راح أتكلَّم لين تطلع نتيجة ( يقيني بـ فضل الله ) ..

حياتي كلها ماشية على تمام الراحة و لله الحمد
لأن يقيني بـ الله أكبر من كل شي
أكبر من الناس و أكبر الدنيا و أكبر من الجامعة و الدراسة و الوظيفة

يستغربون مني الناس , لا شافوني بهالهدوء و الصمت ..
أنا أحب الصمت كثيـر , و أحب أقضي حواجئي بدون علم أحـد ..

..(( في حياتي أسرار كثيـر , ما يعلم فيها أحد غير ربي ))..

لأني متعوِّدة , ما أخرج اللي بـ قلبي لأحد , غير لله ..

و لا أهتمّ لـ شي بذا الدنيا أبداً , لأني واثقة بـ ربي ..

و عارفة إنه معـي , لأني أقول من كل قلبي : ..(( إن الله معـي ))..

..

ممكن اللي بـ داخلي أخرجه في أغلب مواضيعي هنا
لأن أغلب وقتي أستغلَّه في الكتابة

و إن كان ربي وفَّقني في كتاباتي فـ ( هذا من فضل ربي ) ..
..(( و ما توفيقي إلاَّ بـ الله ))..

..

و الله يا بنات الكلام يكثر , و يزيد , و لا يمكن أوصفه ..
خصوصاً لا كان في ذكر ربي , و حبي له ..
و فضله عليّ في أغلب مواقفي في هذه الحياة ..

..

ما همِّني لا تكلّموا فيني الناس , سبُّوني , شتموني , ظلموني ..
بالعكس .. !!
و الله ابتسم من كل قلبي و أحنّ عليهم .. إيه و الله أحن عليهم بـ قوة ..
لأني عارفة إن ربي راح ياخذ حقي منهم ..
و لـ ربي و نصره لي مواقف كثيرة .. ما يعلمها غيره سبحانه ..

أعرف إن ربي يمهل ولا يهمل , أتعجَّب إنهم نسوه و ظلموا الناس ..
بس دايم أقول : ..(( بعدين بيعرفون إن الله حق ))..
..

بس أقولكم .. !!

..(( يومي عرفت ربي , هانت عليّ همومـي ))..
..(( يومي عرفت ربي , ما ضاق قلبي للدنيا ))..

..(( يومي عرفت ربي , ازداد شوقي له ))..

اعرفي ربك , تزدان حياتك , حبِّي ربِّك , و صدقيني ..
راح تحسين بـ مثل ما أحس فيه من راحـة في حياتـي ..
حتى لو كثرت همومـي , و ضاقت دنيتي , ما همِّني ..
لأن في الجنة .. راح نرتاح .. !!
(( وَ نَزَعْنَا مَا فِي صُدُورِهِم مِّنْ غِلٍّ إِخْوَانًا عَلَى سُرُرٍ مُّتَقَابِلِين ))..

خلِّي مناك الجنة , و صدقيني , بـ تهون عليك همومـك ..

و راح تشوفين كل مشكلة تجيك , مجرد نسمة هوا حارة ..
راح يتبعها نسمة هوا أبرد منها ما فيه .. !!

لأن ربي ( مالك قلبي ) قال :
..(( إن بعد العسر يسراً ))..

و أنا واثقة بـ ربي , و عارفة إن راح يعوضنا بعد العسر يسر ..
و بعد المرض شفاء , و بعد التعب راحة ..

بس وين القلوب اللي تثق فيه .. !!

..(( اعذروني لا كان موضوعـي طـويل , بس و الله اللي بـ داخلي أكبر ))..
..(( ياليت ألقى لها صدى طيب في قلوبكم ))..
..(( و تحسون فعلاً , باللي أحس فيه ))..