السلام عليكم ورحمة الله وبركاته
النهاردة جاية ومعايا مشروع جديد
لو عرفنا نعمله
كل مشاكلنا هتتحل ومش هيكون فيه اكتئاب ولا هم ولا نكد
وحياتنا هتكون كلها سعادة ومفيهاش أي كدر
ولو عايزين نعيش زي أيام الصحابة ده هو الحل الوحيد
يا ترى إيه الحل العجيب ده؟
السر بسيط
لن يصلح آخر هذه الأمة الا بما صلح به أولها
طيب وأولها صلح إزاي؟
بالتمسك بتعاليم الاسلام
بس استني هنا شويه
هو تعاليم الاسلام بس صلاة وصوم وزكاة وحج بس؟
كانت العمليه بقت بسيطة خالص والكل دخل الجنة بسهولة
أهم حاجة اللي كتير نسينها إلا من رحم ربي
الدين المعاملة
تعرفوا قرأت عبارة وجعتني قوي
قال محمد عبده عن أهل الغرب بعد ان عاد من زيارة ديارهم: «وجدت هناك اسلاما بلا مسلمين، وأجد هنا مسلمين بلا اسلام»، أي انه وجد فيهم أخلاق الاسلام مع انهم غير مسلمين، ولا يجد فينا اخلاق الاسلام مع اننا مسلمون.
صدقوني لو الرسول صلى الله عليه وسلم شاف إحنا بنعمل إيه دلوقتي والمسلمين اللي تعب علشان يبقوا مسلمين عملوا إيه من بعده
مش عارفة أقول إيه بس
إحنا لو جبنا تعاملات المسلمين مع بعض وصفيناها بمصفاة الشرع مفيش حاجة هتنزل منها خالص إلا من رحم ربي
عن أبي هريرة قال: قال رجل يا رسول الله ان فلانة فذكر من كثرة صلاتها وصدقتها وصيامها غير أنها تؤذي جيرانها بلسانها قال هي في النار قال يا رسول الله فان فلانة فذكر من قلة صيامها وصلاتها وأنها تصدق بالاثوار من الاقط ولا تؤذي بلسانها جيرانها قال هي في الجنة. رواه أحمد والبزار ورجاله ثقات.
وكمان كلنا عارفين حديث المفلس
قال رسول الله صلى الله عليه وسلم: أتدرون من المفلس ؟ قالوا:المفلس فينا من لا درهم له ولا متاع , قال صلى الله عليه وسلم : إن المفلس من أمتي من يأتي يوم القيامة بصلاة وصيام وزكاة , ويأتي وقد شتم هذا ,وقذف هذا , وأكل مال هذا , وسفك دم هذا , وضرب هذا , فيعطي هذا من حسناته وهذا من حسناته فإن فنيت حسناته من قبل أن يقضي ما عليه أخذ من خطاياهم فطرحت عليه ثم طرح في النار ) .. (رواه مسلم)
شوفتو العبرة مش بكثرة الصيام والقيام وتلاوة القرآن بس
فيه حاجة مهمة جدا وهيه التعامل مع الناس
هل اللي بنشوفه كل يوم ده بين الناس فيه شيئ من أخلاق المسلمين ؟
مفيش ورقة تتعمل من غير رشوة ومحدش يقول إكرامية
ومحدش يقول غصب عني لأن لو الكل مدفعشي حاجة مش معقولة الموظفين مش هيشتغلوا لكن طول ما في حد بيستسهل ويدفع عمرنا ما هنخلص
شوفوا تعامل الواحدة وحماتها والعكس
شوفوا تعامل الأبناء مع الآباء
وتعامل الأخوة مع بعض
وتعامل الناس في العمل
وتعامل الأزواج
هقول إيه ولا إيه
شعار الناس دلوقتي
نفسي نفسي
أو أنا ومن ورائي الطوفان
مش هينصلح حالنا إلا لو طبقنا حديث " لا يؤمن أحدكم حتى يحب لأخيه مايحب لنفسه "
أنا عايزة منك حاجتين أو سؤالين لا زم تسأليهم لنفسك قبل ماتعملي أي حاجة
السؤال الأول
لو كان الرسول صلى الله عليه وسلم أو أي زوجة من زوجاته في هذا الموقف كانوا هيعملوا إيه ؟
والسؤال الثاني
هل أنا أحب لنفسي أنه يحصل معاها كده ولا لأه ؟
ومع بعض هنا هنبدأ إن شاء الله حملة كبيرة
بعنوان
تحبي تعيشي ايام الصحابة ؟ تعالي نجرب
وهنحاول فيها مع بعض إننا نكون كما كان الرسول صلى الله عليه وسلم
كان قرءانا يمشي على الأرض
معقولة مش عايزين تكونوا قريبين من الرسول صلى الله عليه وسلم يوم القيامة ؟
يقول صلى الله عليه وسلم :"إن أقربكم مني منزلا يوم القيامة أحاسنكم أخلاقا"
ونشوف إزاي هتكون سلوكياتنا
وأغلبها إن شاء الله من سلسلة السلوكيات لفضيلة الشيخ وجدي غنيم
يالا شدوا الهمة وخلوا شعاركم إلى رضى ربي وصحبة نبيه صلى الله عليه وسلم لن يسبقني أحد
لكن متنسوش حاجة مهمة
إن كل ده عبادة برضه
بس بشرط أحتسب الأجر عند الله سبحانه وتعالى
يعني النية تجعل العادة عبادة؟
طبعا
وأنا ببتسم وافتكر حديث " تبسمك في وجه أخيك صدقة "
بقت الابتسامة عبادة
أنا بنظف البيت وأفتكر حديث " كلكم راع وكلكم مسئول عن رعيته "
بقى التنظيف عباده
وأنا بطبق الكلام اللي هيجي إن شاء الله عن السلوكيات وابتغي بها رضى الله سبحانه وتعالى
وتطبيق أوامر نبيه والسير على خطاه
وإني أحاول أبين الصورة الحقيقية للإسلام وأدعو إلى الاسلام بسلوكي
ده عبادة وهكذا
ومتنسوش إن فضل الله واسع
يعني ممكن النوايا تتعدد للعمل الواحد
إيه رأيكم
مين معايا ؟
المواضيع القيمة والمثمرةبارك الله فيك ولاحرمنا هذا التميز والتألق دمتي بحفظ الله مع تحياتي لك غاليتي
|
بارك الله فيك
وجزاك الله خير |