لو طفلك فوق التلات سنين ورافض نوعيات الاكل دى
فاكهه او خضار او لحوم او لبن او بيض
تعالى اقوللك تعملى ايه
الحاجات دى اجتهادات شخصيه منى وجربتها مع بنتى ونفعت الحمد لله
اولا: الفاكهه
اغلب الاطفال مش بياكلوا غير نوع ولا نوعين من الفاكهه
والباقى مش بيجب جنبه فحين ان الفاكهه مفيده جدا
انا بقا اخترعت لبنتى اختراع عجبها اوى
الفخفاخينا بس بطريقه سهله
اعملى عصير اى حاجه
ممكن جوافه او موز باللبن او فراوله او كانتالوب او بطيخ انا بعصر البطيخ لانى مش بحب اكله
اى عصير بس بلاش برتقال مش هيبقا حلو
وجيبى كوبايه فاضيه طويله
وقطعى فراوله وجوافه وكنتالوب اى انواع فاكهه عندك
وصبى فوقهم العصير
صدقينى هيعجب ابنك جدا
انا بنتى مبتجيش ناحيه الفاكهه غير بالطريقه دى
وفى طريقه تانيه وهى التورته
اعملى تورته فالبيت وزوقيها من جوه ومن بره بالفاكهه بس تكون طريه
وفى طريقه تالته وهى طريقه سلاطه الفواكه بالكريم شانتيه او بالايس كريم
قطعى برضه كذا نوع فاكهه واعصرى عليهم شويه برتقال
وحطى من فوق كريم شانتيه او ايس كريم بيبقا خطيييييييييييييييير
ثانيا :الخــــــــضــــــــار
الخضار برضه بيبقا مشكله مع الاطفال
انا لاقيت حلول ليه سهله وجميله جدا
اسلقى الخضار الى عاوزه ابنك ياكله بس ياريت يكون مشكل
يعنى مثلا بسله بالجزر او فاصوليا مع بسله اى حاجه زى ما تحبى
واعملى بشاميل وخفيفيه باللبن بعد ما تعمليه
وهاتى سامبوسك وحطى معلقه بشاميل وعليها الخضار وقفلى السامبوسك
وحمريها وهتلاقى طعم خطييييييير مستحيل ابنك يرفضه
وممكن بالسامبوسك برضه تحشيها الاتى
طماطم وعليها فلفل اى لون اخضر او احمر او اصفر او كلهم
وعليهم بقدونس وجبنه اى نوع يفضل الفيتا وممكن كمان تحطى زيتون
واعصرى عليهم كلهم ليمون وملح وسنه زيت وقلبيهم كويس واحشى بيهم السامبوسك
طعمها مش يفرق حاجه عن البيتزا
وفى طريقه اسهل
الجلاش هاتى الجلاش واعمليه عادى بس الحشو يكون طبقه جبنه فيتا وعليها رشه رومى
وقطعى عليهم طماطم وفلفل وزيتون وبقدونس هتبقا عامله زى الفطير
هتعجب ابنك اوى
ثالثا: اللــــــــــــحوم
بالنسبه للفراخ احلى حاجه يحبها الاطفال هى الشاورما او طريقه كنتاكى
بصى انا بعمل الشاورما لبنتى ازاى بتبقا احلى من بره والله
فصين توم واديهم لون خفيف فشويه زيت
تكونى سالقه فرختك ومقطعاها تحطيها عليهم
ولما تحسى انها بدأت تتحمر شويه هتحطى عليهم بصل مقطع وفلفل رومى
وطبعا ملح وفلفل وبقدونس وشويه خل
وفالاخر خالص الطماطم عشان مش تنزل ميتها
وفساندوتشات بقا وعليهم طحينه وادعيلى
وطريقه الكنتاكى بعملها كالتالى
بعد ما تسلقى الفراخ طبعا
دى خلطتها
دقيق وعليه شويه ميه ودوبيه وياريت تكون ميه قليله عاوزنها سميكه مش خفيفه
وتحطى بيضه وكمون وملح وفلفل ولمونه وقلبيهم كويس اوى
وحطى فيها الفراخ وحمريها بس خالى بالك عشان بتطرطش شويه
وبتبقا رووووووعه
اللحمه بقا احسن حاجه المفرومه
استخدميها فالكفته وخصوصا الكفته البانيه
او فالبشاميلات
رابعا: اللبن والبيض
اللبن احسن حاجه واشهر حاجه ليه هو والبيض مع بعض
الكريم كراميل
وبيبقا جميل جدا
وممكن تعملى باللبن دانيت فالبيت وليه طرق كتير فقسم الحلويات هنا
انا بعمله كيلو اللبن عليه اربع معالق دقيق وكل كوب لبن عليه 3 معالق سكر
وفانيليا وكاكاو نسكويك وقلبيهم عالنار زى البشاميل بالظبط
بياخد وقت عشان يمسك مش تقلقى وبلاش نشا عشان بيبوظ طعمه خالص
وكمان اللبن اعملى رز باللبن او مهلبيه
والبيض فالكيكه
والبشاميل كمان بيبقا فيها اللبن والبيض مع بعض
وممكن تجربى تعملى لطفلك بيض اومليت بيحبوه اوى
وفى طريقه البيض البيتزا راااائعه دوقتها فشرم مره واخدت الطريقه من الشيف
عباره عن بيض اضربيه بالشوكه
وحطى فلفل الوان او اخضر مش فارق ومعاهم رشه جبنه رومى
ومعاهم طماطم بسيط
وعالنار بقا ودوقى
الاطفال بيحبوها اوى
ويارب تكون افكارى عجبتكم
تحفه ما انا اعملو لنفســـــــــى هههههههههههههههههههههه
بما ان مفيش ولأدن22
مودتــــــى 
كل الحـبن25
ابنك رافض الخضار او الفاكهه او اللحوم او اللبن او البيض طب تعالى افكار تجـــــنن
يسلمو بنوته
ودي
ابنك رافض الخضار او الفاكهه او اللحوم او اللبن او البيض طب تعالى افكار تجـــــنن
افكار جميلة
يسلمووو بنوتة
يسلمووو بنوته حبيبتىا تحياتى دوى